प्राजक्त - Night-flowering Jasmine

प्राजक्त ........ डॉ. अनुराधा पंडितराव .........२४.०४.२०२० इवलेसे पण दिमाखदार हे प्राजक्ताचे फूल, गर्द शेंदरी देठावरती शुभ्र पांढरी झूल! सात पाकळ्या नाजूक नाजूक श्वेतवस्त्र लेऊनी, नर्तिकाच जणू नर्तन करिती हातात हात घालूनी! वाऱ्याच्या लटक्या स्पर्शाने हवेत गिरकी घेती, शुभ्र केशरी सडा घालती हिरव्या बुंध्याभवती! मोहक, मंगल, सुगंध अवखळ वारा पसरवी, सुवासिक, सुंदर गालिचा ओल्या धरतीवरी ! बोल फुला रे माझ्यासंगे कोडे उलगडण्यापायी, मातीच्या मिलनाची तुज रे घाई कशापायी? आज कळी अन् उद्या फूल हा प्रयास कशासाठी? उत्तर देई, लपवीत आपुले खट्याळ हसू ओठी, रे मानवा, निसर्गाचा नियम पाळण्यासाठी, नियतीचा नित्यक्रम असे हा नवनिर्मितिसाठी! क्षणभंगुर आयुष्य जरी हे आनंदाने जगावे, उपभोगावे, देत रहावे, हसता हसता जावे!