'अंतिम सत्य' - Last Truth

'अंतिम सत्य' ........ डॉ. अनुराधा पंडितराव ........२८.०४.२०२० झेपावली पिल्लं लांब दूरदेशा उदास,एकटे वाटे मला आताशा! आठवती मज त्या रम्य बाळलीला, शाळेमधल्या खट्याळ,अवखळ खोड्या! पदवी घेताना भरुन आलेली छाती, विसरू कशी वात्सल्यपूर्ण ती मिठी! अशाच एका उदास संध्याकाळी, बसले होते निश्चल तळ्याच्या काठी शून्यात नजर अन् हृदयी तीव्र वेदना जुन्या आठवणी काही केल्या हटेना ! तेवढ्यात पडला हात खांद्यावर, आश्वासक अन् तेवढाच कणखर! घेऊनी जवळ हळूवार मला समजावे, पिल्लांची भरारी,स्वप्न तयांचे मोठे! उज्ज्वल भविष्याचे पंख का छाटावे, प्रगतीत त्यांच्या सुख आपण शोधावे! पिल्लं उडाली उत्तुंग यश साधाया, कारण पुरे की जन्म सार्थक व्हाया! सखा अलगद घेऊनी हातात हात, म्हणे हसूनी, ' तू मला अन् मी तुला', हेच अंतिम सत्य! मनमुराद फिरूया, खूप हसूया, फिरुनी पुन्हा लहान होऊया, चुकभूल सारी विसरून जाऊया, जीवनाचा आस्वाद घेऊया, परस्परांना वेळ देऊया, आनंदात झोकून देऊया....!